ಶಿವಮೊಗ್ಗ: ಬಾಳೆಹೊನ್ನೂರಿನಿಂದ ಸೆರೆಹಿಡಿದು ಸಕ್ರೆಬೈಲು ಆನೆ ಬಿಡಾರಕ್ಕೆ ಕರೆತರಲಾಗಿದ್ದ 32 ವರ್ಷದ ಶೌರ್ಯ ಆನೆ ಮೃತಪಟ್ಟಿದ್ದು, ಆನೆಗಳ ಲಾಲನೆ–ಪಾಲನೆ ಹಾಗೂ ವೈದ್ಯಕೀಯ ನಿರ್ವಹಣೆ ಕುರಿತು ಮತ್ತೊಮ್ಮೆ ಚರ್ಚೆ ಹುಟ್ಟುಹಾಕಿದೆ.
ಚಿಕ್ಕಮಗಳೂರು ಜಿಲ್ಲೆಯ ಬಾಳೆಹೊನ್ನೂರು ಭಾಗದಲ್ಲಿ ಇಬ್ಬರ ಸಾವಿಗೆ ಕಾರಣವಾಗಿದ್ದ ಶೌರ್ಯ ಆನೆಯನ್ನು ಏಪ್ರಿಲ್‍ನಲ್ಲಿ ಖೆಡ್ಡಾಕ್ಕೆ ಬೀಳಿಸಿ ಸೆರೆಹಿಡಿಯಲಾಗಿತ್ತು. ಬಳಿಕ ಅದನ್ನು ಸಕ್ರೆಬೈಲು ಆನೆ ಬಿಡಾರಕ್ಕೆ ಕರೆತಂದು ಪಳಗಿಸುವ ಪ್ರಕ್ರಿಯೆ ನಡೆಸಲಾಗುತ್ತಿತ್ತು. ಇದೀಗ ಶೌರ್ಯ ಮೃತಪಟ್ಟಿರುವ ಹಿನ್ನೆಲೆಯಲ್ಲಿ ಆನೆಯ ಆರೋಗ್ಯದ ಮೇಲ್ವಿಚಾರಣೆ, ಚಿಕಿತ್ಸೆ ಹಾಗೂ ಶಿಬಿರದ ನಿರ್ವಹಣೆ ಕುರಿತು ಪ್ರಶ್ನೆಗಳು ಎದ್ದಿವೆ.
ಶೌರ್ಯನ ಸಾವಿನಿಂದ ಸಕ್ರೆಬೈಲು ಆನೆ ಬಿಡಾರದಲ್ಲಿದ್ದ ಆನೆಗಳ ಸಂಖ್ಯೆ 24ರಿಂದ 23ಕ್ಕೆ ಇಳಿದಿದೆ. ಈ ಹಿಂದೆ ಕೂಡ ಶಿಬಿರದಲ್ಲಿ ಹಲವು ಆನೆಗಳು ಮೃತಪಟ್ಟಿರುವ ಹಿನ್ನೆಲೆಯಲ್ಲಿ, ಆನೆಗಳ ಆರೋಗ್ಯ ರಕ್ಷಣೆ ಮತ್ತು ನಿರ್ವಹಣಾ ವ್ಯವಸ್ಥೆಯ ಬಗ್ಗೆ ಪ್ರಾಣಿಪ್ರಿಯರು ಹಾಗೂ ಸಾರ್ವಜನಿಕ ವಲಯದಲ್ಲಿ ಆತಂಕ ವ್ಯಕ್ತವಾಗುತ್ತಿದೆ.
ಹಾಸನ ಸೇರಿದಂತೆ ವಿವಿಧ ಜಿಲ್ಲೆಗಳಲ್ಲಿ ಸೆರೆಹಿಡಿಯಲಾಗುವ ಆನೆಗಳನ್ನು ಸಕ್ರೆಬೈಲಿಗೆ ಕರೆತಂದು ಪಳಗಿಸುವ ಕಾರ್ಯ ನಡೆದಿದೆ. ಈ ಸಂದರ್ಭದಲ್ಲಿ ಆನೆಗಳ ಆರೋಗ್ಯ, ಆಹಾರ, ಚಿಕಿತ್ಸೆ ಹಾಗೂ ನಿರಂತರ ವೈದ್ಯಕೀಯ ಮೇಲ್ವಿಚಾರಣೆಗೆ ಹೆಚ್ಚಿನ ಆದ್ಯತೆ ನೀಡಬೇಕು ಎಂಬ ಆಗ್ರಹ ಕೇಳಿಬಂದಿತ್ತು.
ಈ ಹಿಂದೆ ಹಾಸನದಿಂದ ಸಕ್ರೆಬೈಲಿಗೆ ಬಂದಿದ್ದ ವಿಕ್ರಾಂತ್ ಆನೆಯ ಆರೋಗ್ಯ ಸ್ಥಿತಿಯ ಬಗ್ಗೆಯೂ ಚರ್ಚೆ ನಡೆದಿತ್ತು. ಬಾಲಣ್ಣ ಎಂಬ ಆನೆಯ ಕಿವಿಗೆ ಗಾಯವಾಗಿದ್ದ ಘಟನೆ ಕೂಡ ಪ್ರಾಣಿಪ್ರಿಯರು ಹಾಗೂ ಪತ್ರಿಕೆಗಳಲ್ಲಿ ವರದಿಯಾಗಿತ್ತು. ಈ ಘಟನೆಗಳ ಹಿನ್ನೆಲೆಯಲ್ಲಿ ಆನೆಗಳ ಸುರಕ್ಷತೆ ಮತ್ತು ಆರೈಕೆಯ ಕುರಿತು ಸಮಗ್ರ ಪರಿಶೀಲನೆ ನಡೆಸಬೇಕೆಂಬ ಒತ್ತಾಯ ಕೇಳಿಬರುತ್ತಿದೆ.
ಶಿಬಿರದಲ್ಲಿ ಈ ಹಿಂದೆಯೂ ಆನೆಗಳ ಸಾವು ಸಂಭವಿಸಿದ್ದರೂ, ಶಾಶ್ವತ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿಲ್ಲ ಎಂಬ ಆರೋಪಗಳು ಕೇಳಿಬರುತ್ತಿವೆ. ಅಧಿಕಾರಿಗಳ ತಪಾಸಣೆ ಮತ್ತು ಮೇಲಧಿಕಾರಿಗಳ ಭೇಟಿ ನಡೆಯುತ್ತಿದ್ದರೂ, ಅದರ ಪರಿಣಾಮಕಾರಿ ಫಲಿತಾಂಶ ಏನು ಎಂಬ ಪ್ರಶ್ನೆಯೂ ಎದುರಾಗಿದೆ.
ಶೌರ್ಯ ಆನೆಯ ಸಾವಿನ ನಿಖರ ಕಾರಣ ಇನ್ನμÉ್ಟೀ ಅಧಿಕೃತವಾಗಿ ಸ್ಪಷ್ಟವಾಗಬೇಕಿದೆ. ಮರಣೋತ್ತರ ಪರೀಕ್ಷೆ ಹಾಗೂ ವೈದ್ಯಕೀಯ ವರದಿ ಆಧರಿಸಿ ಸಾವಿನ ಕಾರಣ ಬಹಿರಂಗವಾಗಬೇಕಿದೆ. ಯಾವುದೇ ವೈದ್ಯಕೀಯ ಅಥವಾ ನಿರ್ವಹಣಾ ಲೋಪವಿದ್ದರೆ ಅದನ್ನು ಗುರುತಿಸಿ ಹೊಣೆಗಾರಿಕೆ ನಿಗದಿಪಡಿಸಬೇಕು ಎಂಬ ಆಗ್ರಹವೂ ವ್ಯಕ್ತವಾಗಿದೆ.
ಶೌರ್ಯನ ಸಾವಿನ ಕುರಿತು ನಡೆಯುವ ತನಿಖೆ ಕೇವಲ ಔಪಚಾರಿಕವಾಗದೆ, ಆನೆಯ ಆರೋಗ್ಯದ ಹಿಂದಿನ ದಾಖಲೆಗಳು, ನೀಡಲಾದ ಚಿಕಿತ್ಸೆ, ಆಹಾರ, ಆರೈಕೆ ಮತ್ತು ವೈದ್ಯಕೀಯ ಮೇಲ್ವಿಚಾರಣೆ ಸೇರಿದಂತೆ ಸಂಪೂರ್ಣ ವ್ಯವಸ್ಥೆಯನ್ನು ಪರಿಶೀಲಿಸಬೇಕಿದೆ ಎಂಬುದು ಪ್ರಾಣಿಪ್ರಿಯರ ಒತ್ತಾಯವಾಗಿದೆ.
