ಶಿವಮೊಗ್ಗ,ಸೆ.13:

ನಗರದಲ್ಲಿ ಅತ್ಯಂತ ಚಿಕ್ಕ ವಯಸ್ಸಿನ ಪುಡಿರೌಡಿಗಳ ತಂಡದ ಕುಡಿತ ಹಾಗೂ ಅದರ ಮತ್ತಿನಲ್ಲಿ ಜನನಿಬಿಡ ಸ್ಥಳಗಳಲ್ಲೇ ನಾನಾ ಅವಘಡಗಳನ್ನು ಸೃಷ್ಟಿಸುತ್ತಿರುವುದು ಆತಂಕದ ಸಂಗತಿ.
ನಿನ್ನೆ ರಾತ್ರಿ 8.30 ರ ಹೊತ್ತಿಗೆ ಶಿವಮೊಗ್ಗ ಆಪ್ಟಿಕಲ್ಸ್ ಮಗ್ಗುಲಲ್ಲಿರುವ ಹರ್ಷ ಸ್ಪೋರ್ಟ್ಸ್ ಮಾಲಿಕ ಸೇರಿದಂತೆ ಹಲವರ ಮೇಲೆ ಈ ಪುಡಿರೌಡಿಗಳ ತಂಡ ಹಲ್ಲೆ ನಡೆಸಲು ಮುಂದಾಗಿ ಮಾರಕಾಸ್ತ್ರಗಳಿಂದ ಬೆದರಿಸಿ ರಂಪಾಟ ಸೃಷ್ಟಿಸಿದ ಘಟನೆ ವರದಿಯಾಗಿದೆ.
ಶಿವಮೊಗ್ಗದ ಅತ್ಯಂತ ಪ್ರಮುಖ ಸ್ಥಳವಾದ ಗೋಪಿ ಸರ್ಕಲ್ ಸಮೀಪದಲ್ಲಿರುವ ಹರ್ಷ ಸ್ಪೋರ್ಟ್ಸ್ ಅಂಗಡಿಯ ಮಾಲಿಕ ಸುಹಾಸ್ ಹಾಗೂ ಆತನ ಸ್ನೇಹಿತ ಕಿರಣ್ ಮೇಲೆ ಹಲ್ಲೆ ನಡೆಸಲು ಈ ಯುವಕರು ಮುಂದಾಗಿದ್ದ ಬಗ್ಗೆ ದೂರು ದಾಖಲಾಗಿದೆ. ಅವರು ಅತಿಯಾದ ಮದ್ಯಸೇವನೆ ಜೊತೆಗೆ ಗಾಂಜಾ ಘಮಲಿನಲ್ಲಿ ತೇಲಾಡುತ್ತಿದ್ದರು ಎನ್ನಲಾಗಿದೆ. ಈ ಆರೋಪ ದೂರುದಾರದೇ ಆಗಿದೆ. ಈ ಪುಡಿರೌಡಿಗಳ ವಯಸ್ಸು 18ರ ಆಜುಬಾಜಿನಲ್ಲಿ ಇದೆ. ಇದೊಂದು ಮಲೆನಾಡಿಗೆ ಸೂಜಿಗದ ಸಂಗತಿಯಾಗಿದೆ ಎನ್ನಬಹುದು.
ಶಿವಮೊಗ್ಗ ನಗರದ ಜನನಿಬಿಡ ಸ್ಥಳದಲ್ಲಿ ಜನರಿರುವಾಗಲೇ ಮಚ್ಚು-ಲಾಂಗು ತೋರಿಸಿ ಬೆದರಿಸುತ್ತಾರೆ ಎಂದರೆ ಅವರ ಕುಡಿತ ಮತ್ತು ತುಡಿತದ ಮತ್ತನ್ನು ಯೋಚಿಸಬೇಕಾಗುತ್ತದೆ.
ರಾತ್ರಿ ದೊಡ್ಡಪೇಟೆ ಪೊಲೀಸ್ ಠಾಣೆಯಲ್ಲಿ ಈ ಸಂಬಂಧ ದೂರು ದಾಖಲಾಗಿದ್ದು ಕಾರ್ಯಾಚರಣೆಯಲ್ಲಿ ಪೊಲೀಸರು ಈಗಾಗಲೇ ಹಲವರನ್ನು ವಿಚಾರಣೆಗೊಳಪಡಿಸಿದ್ದಾರೆ ಎಂದು ಹೇಳಲಾಗುತ್ತಿದೆ ಪದೇಪದೇ ಇಂತಹ ಕಾರ್ಯ ಮಾಡುತ್ತಿದ್ದ ಈ ಬಾಲಕರು 18 ವರ್ಷದ ಒಳಗಿನ ಹೆಸರಲ್ಲಿ ದೂರುಗಳಿಂದ ಮುಕ್ತರಾಗಿ ಪಡೆಯುತ್ತಿದ್ದರು ಎನ್ನಲಾಗಿದೆ.
ಈ ಸಂದರ್ಭದಲ್ಲಿ ಅಲ್ಲಿಗೆ ಬಂದ ಪೊಲೀಸ್ ವಾಹನಕ್ಕೆ ಬೈಕೊಂದು ಡಿಕ್ಕಿ ಹೊಡೆದಿದೆ ಎನ್ನಲಾಗಿದೆ.