ಬೆಂಗಳೂರು, ಅ.14:
ಇಂದು ರಾಜ್ಯಾದ್ಯಂತ ತೆರೆಕಂಡ ದುನಿಯಾ ‌ವಿಜಯ್ ಅವರ ಚಲನಚಿತ್ರ ಸಲಗ ಬಿಡುಗಡೆಯಾಗಿದ್ದು, ಅವರ ಅಭಿಮಾನಿ ವರ್ಗದ ಪ್ರೇಕ್ಷಕರು ಸಖತ್ ಎಂಜಾಯ್ ಮಾಡಿದ್ದಾರೆ.
ಚಿತ್ರದ ನಟ ಆಗಿರುವ ದುನಿಯಾ ವಿಜಯ್ ಅವರೇ ನಿರ್ದೇಶಿಸಿರುವ ಸಲಗ ಚಲನಚಿತ್ರದ ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದರು. ಆದರೆ ದುನಿಯಾ ವಿಜಿ ಅಭಿಮಾನಿಗಳು ಎನೂ ಬಯಸುತ್ತಾರೋ ಅದನ್ನೆ ಅಚ್ಚುಕಟ್ಟಾಗಿ ತೆರೆಮೇಲೆ ತಂದಿದ್ದಾರೆ.

ದುನಿಯಾ ವಿಜಿ ಸಲಗ ಚಿತ್ರದಿಂದ‌ ತಾವೊಬ್ಬ ಉತ್ತಮ ನಿರ್ದೇಶಕ ಎಂಬುದು ಸಾಬೀತುಪಡಿಸಿದ್ದಾರೆ.
ಸಲಗ‌ ಸಿನಿಮಾ‌ ಪಕ್ಕಾ‌ ರೌಡಿಜಂ ಸಿನಿಮಾವಾಗಿದ್ದು, ಸೇಡಿನ ಚಿತ್ರವಾಗಿದೆ.
ದುನಿಯಾ ವಿಜಯ್ ಇಂತಹ ಹಲವು ಸಿನಿಮಾಗಳನ್ನು ಮಡಿದ್ದರೂ ಕೂಡ ಬಂದಿದ್ದರೂ ಸಹ ಈ ಚಿತ್ರದಲ್ಲಿ ಅದ್ದೂರಿ ಮೇಕಿಂಗ್​ನಿಂದ ಗಮನ ಸೆಳೆದಿದ್ದಾರೆ. ಈ ಚಿತ್ರದಲ್ಲಿ ವಿಜಯ್​ ಸಲಗ ಎಂಬ ಹೆಸರಿನಲ್ಲಿ ನಟೋರಿಸ್​ ರೌಡಿ. ಯಾರನ್ನು ಕೊಲೆ ಮಾಡಲೂ ಆತ ಹೇಸುವುದಿಲ್ಲ. ಅಷ್ಟಕ್ಕೂ ಅವನು ಯಾಕೆ ಅಂಥ ರೌಡಿ ಆದ? ಊರ ತುಂಬೆಲ್ಲ ಅವನಿಗೆ ಯಾಕೆ ದುಶ್ಮನ್​ಗಳು ಇದ್ದಾರೆ? ಅವರನ್ನೆಲ್ಲ ಆತ ಹೇಗೆ ಮಟ್ಟ ಹಾಕುತ್ತಾನೆ? ಸಲಗನ ಎದೆಯೊಳಗೆ ಹೊತ್ತಿಕೊಂಡಿರುವ ಸೇಡಿನ ಬೆಂಕಿಗೆ ಕಾರಣ ಏನು? ಇದನ್ನೆಲ್ಲ ತಿಳಿಯಲು ಪೂರ್ತಿ ಚಿತ್ರ ನೋಡಬೇಕು.
ಸಲಗ ಸಿನಿಮಾ ಮಾಸ್​ ಪ್ರೇಕ್ಷಕರಿಗೆ ಹಬ್ಬವಾಗಿದ್ದು, ಮಾಸ್​ ಸಿನಿಮಾವನ್ನು ಎಂಜಾಯ್​ ಮಾಡುವ ಪ್ರೇಕ್ಷಕರಿಗೆ ಈ ಚಿತ್ರದಿಂದ ಭರ್ಜರಿ ಮನರಂಜನೆ ಸಿಗಲಿದೆ. ಮೈನವಿರೇಳಿಸುವ ಸಾಹಸ ದೃಶ್ಯಗಳು, ಕಣ್ಣೀರು ತರಿಸುವ ಫ್ಯಾಮಿಲಿ ಸೆಂಟಿಮೆಂಟ್​, ಅಪರೂಪಕ್ಕೊಮ್ಮೆ ಕಚಗುಳಿ ಇಟ್ಟು ರಿಲ್ಯಾಕ್ಸ್​ ಮಾಡಿಸುವ ಕಾಮಿಡಿ ದೃಶ್ಯಗಳನ್ನು ಪಕ್ಕಾ ಕಮರ್ಷಿಯಲ್​ ಹದದಲ್ಲಿ ವಿಜಯ್​ ಹೆಣೆದಿದ್ದಾರೆ. ಯಾವ ಸನ್ನಿವೇಶವನ್ನೂ ಎಳೆದಾಡದೇ 2 ಗಂಟೆ 8 ನಿಮಿಷದಲ್ಲಿ ಅವರು ಸಿನಿಮಾ ಪೂರ್ಣಗೊಳಿಸಿದ್ದಾರೆ.
ಸಲಗ ಸಿನಿಮಾದಲ್ಲಿ ಮಾಸ್ತಿ ಬರೆದಿರುವ ಡೈಲಾಗ್​ಗಳು ಈ ಸಿನಿಮಾದಲ್ಲಿ ಮಹತ್ವದ ಪಾತ್ರ ವಹಿಸಿವೆ. ಈ ಸಂಭಾಷಣೆಗಳು ಪ್ಲಸ್​ ಮತ್ತು ಮೈನಸ್​ ಎರಡೂ ಆಗಬಹುದು. ಪಂಚಿಂಗ್​ ಡೈಲಾಗ್​ಗಳು ಖುಷಿ ಕೊಡುತ್ತವೆ. ಆದರೆ ಅದರ ನಡುವೆ ಬರುವ ಬೈಗುಳಗಳು ಒಂದು ವರ್ಗದ ಪ್ರೇಕ್ಷಕರಿಗೆ ಕಿರಿಕಿರಿ ಉಂಟು ಮಾಡಬಹುದು. ಸೂಮಗ, ಬೋಮಗ, ಗಾಂ, ಶಾ ಇತ್ಯಾದಿ ಬೈಗಳುಗಳು ಆಗಾಗ ಕೇಳಿಸುತ್ತಲೇ ಇರುತ್ತವೆ. ಪ್ರೇಕ್ಷಕರು ಇದನ್ನೆಲ್ಲ ಸಹಿಸಿಕೊಂಡರೆ ಚಿತ್ರ ರುಚಿಸಬಹುದು.
ಸಲಗ‌ ಚಿತ್ರಕ್ಕೆ ಸೆನ್ಸಾರ್​ ಮಂಡಳಿಯಿಂದ ‘ಎ’ ಪ್ರಮಾಣಪ್ರತ ಸಿಕ್ಕಿದೆ. ಅಂದರೆ ವಯಸ್ಕರು ಮಾತ್ರ ನೋಡಬಹುದು. ಹಿಂಸೆಯ ದೃಶ್ಯಗಳು ಕಟ್ಟಿಗೆ ರಾಚುತ್ತವೆ. ಹಲವು ಸನ್ನಿವೇಶಗಳಲ್ಲಿ ರಕ್ತಪಾತ ರಾರಾಜಿಸಿದೆ. ಹಾಗಾಗಿ ಕೌಟುಂಬಿಕ ಪ್ರೇಕ್ಷಕರು ಇದನ್ನು ಇಷ್ಟಪಡದೆಯೂ ಇರಬಹುದು. ತುಂಬ ರಾ, ರಗಡ್​ ಮೇಕಿಂಗ್​ ನೋಡಿ ಎಂಜಾಯ್​ ಮಾಡುವವರಿಗೆ ‘ಸಲಗ’ ಚಿತ್ರ ಹೇಳಿ ಮಾಡಿಸಿದಂತಿದೆ.
‘ಸಲಗ’ಕ್ಕೆ ಬಲ ತಂದ ಕಲಾವಿದರು
ಈ ಚಿತ್ರಕ್ಕೆ ವಿಜಯ್​ ಹೀರೋ ಆಗಿದ್ದರೂ ಕೂಡ, ಅವರು ಬೇರೆ ಎಲ್ಲ ಕಲಾವಿದರಿಗೂ ಸೂಕ್ತ ಮನ್ನಣೆ ನೀಡಿದ್ದಾರೆ. ಪ್ರಮುಖವಾದ ಎಲ್ಲ ಪಾತ್ರಗಳಿಗೆ ಅಗತ್ಯ ಸ್ಕ್ರೀನ್​ ಸ್ಪೇಸ್​ ನೀಡಿದ್ದಾರೆ. ಸಾವಿತ್ರಿ (ಕಾಕ್ರೋಚ್​ ಸುಧಿ), ಎಸಿಪಿ ಸಾಮ್ರಾಟ್​ (ಡಾಲಿ ಧನಂಜಯ), ಕೆಂಡ (ಶ್ರೇಷ್ಠ) ಮುಂತಾದ ಪಾತ್ರಗಳು ಪರದೆ ಮೇಲೆ ಮಿಂಚಿವೆ. ಹಾಡುಗಳಿಂದಾಗಿ ಸಿನಿಮಾದ ಕ್ರೇಜ್​ ಹೆಚ್ಚಿದೆ.