ಹೊಸನಗರ; ನ.26 :ಶ್ರೀಗಂಧದ ಮರದ ತುಂಡುಗಳನ್ನು ಸಾಗಿಸುತ್ತಿದ್ದ ಆರೋಪಿಯನ್ನು ಪೊಲೀಸ್ ಅರಣ್ಯ ಸಂಚಾರಿ ದಳದ ತಂಡ ಬಂಧಿಸಿದೆ. ತಾಲೂಕಿನ ಮಾರುತಿಪುರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕಚ್ಚಿಗೆಬೈಲು ಗ್ರಾಮದಲ್ಲಿ ಆರೋಪಿ ಹೊಸಕೆಸರೆ ಗ್ರಾಮದ ನಿವಾಸಿ ಹನೀಫ್

ಎಂಬಾತ ಹಸಿ ಗಂಧದ ತುಂಡುಗಳನ್ನು ಸಾಗಿಸುತ್ತಿದ್ದ ವೇಳೆ ದಾಳಿ ನಡೆಸಿದ ಅಧಿಕಾರಿಗಳ ತಂಡ ಆರೋಪಿಯನ್ನು ಮಾಲು ಸಮೇತ ವಶಕ್ಕೆ ಪಡೆದಿದೆ. ಆರೋಪಿಯಿಂದ ೩.೪೦೦ ಕೆಜಿ ಶ್ರೀಗಂಧ ಹಾಗೂ ೩ ಗರಗಸಗಳನ್ನು ವಶಕ್ಕೆ ಪಡೆಯಲಾಗಿದ್ದು, ಆರೋಪಿಗೆ ನ್ಯಾಯಾಂಗ ಬಂಧನ

ವಿಧಿಸಲಾಗಿದೆ ಕಾರ‍್ಯಾಚರಣೆಯಲ್ಲಿ ಪೊಲೀಸ್ ಅರಣ್ಯ ಸಂಚಾರಿ ದಳದ ಸಾಗರ ವಿಭಾಗದ ಉಪನಿರೀಕ್ಷಕ ವಿನಾಯಕ, ಅರಣ್ಯ ಇಲಾಖೆ

ಆರ್‌ಎಫ್ ಅನಿಲ್‌ಕುಮಾರ್, ಡಿಆರ್‌ಎಫ್‌ಓ ಅನಿಲ್ ಬೆಳ್ಳೆನವರ್, ರಾಘವೇಂದ್ರಗೌಡ, ಅರಣ್ಯ ರಕ್ಷಕರಾದ ಪುಟ್ಟಸ್ವಾಮಿ, ರಮೇಶ್, ಸುರೇಶ್ ಇದ್ದರು. ಆರೋಪಿ ಈ ಹಿಂದೆಯೂ ಹಲವು ಬಾರಿ ಶ್ರೀಗಂಧ ಕಳ್ಳತನ ಪ್ರಕರಣಗಳಲ್ಲಿ ಆರೋಪಿಯಾಗಿದ್ದಾನೆ.