ಕೊಲೆಯಾದ ರೌಡಿ ಶೀಟರ್ ನವುಲೆ ನಾಗೇಶ
ಶಿವಮೊಗ್ಗ: ಹಿಂದಿನ ವೈಶಮ್ಯದಿಂದ ರೌಡಿ ಶೀಟರ್ ನವುಲೆ ನಾಗೇಶನ ಕೊಲೆ ಮಾಡಿ ಕಣ್ಣುತಪ್ಪಿಸಿಕೊಂಡಿದ್ದ ಆರೋಪಿಗಳಲ್ಲಿ ಇಬ್ಬರನ್ನು ಕ್ಷಿಪ್ರ ಕಾರ್ಯಾಚರಣೆ ಮೂಲಕ ಬಂಧಿಸುವಲ್ಲಿ ವಿನೋಬ ನಗರ ಪೊಲೀಸರು ಯಶಸ್ವಿಯಾಗಿದ್ದಾರೆ.
ನವುಲೆ ಗ್ರಾಮದ ವಾಸಿಯಾದ ನಾಗೇಶ (30) ಈತನನ್ನು ಹಳೆಯ ದ್ವೇಶದ ಕಾರಣಕ್ಕೆ ಆರೋಪಿಗಳಾದ ಕಿರಣ ಮತ್ತು ಇತರರು ಸೇರಿ ಕೊಲೆ ಮಾಡಿದ್ದರು, ಈ ಕುರಿತು ನಾಗೇಶನ ಸಹೋದರ ವಿನೋಬನಗರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಿಸಿದ್ದರು.
ದೂರು ದಾಖಲಿಸಿಕೊಂಡ ಪೊಲೀಸರು ಪ್ರಕರಣದಲ್ಲಿ ತನಿಖೆ ಮುಂದು ವರೆಸಿ ತಲೆ ಮರೆಸಿಕೊಂಡಿದ್ದ ಆರೋಪಿತರ ಪತ್ತೆಗೆ ಬಲೆ ಬೀಸಿದ್ದರು. ಡಿವೈಎಸ್‌ಪಿ ಉಮೇಶ್ ಈಶ್ವರ್ ನಾಯಕ್ ಮಾರ್ಗದರ್ಶನದಲ್ಲಿ, ವೃತ್ತ ನಿರೀಕ್ಷಕ ವಸಂತ್ ಕುಮಾರ್, ಹಾಗೂ ಕೋಟೆಯ ವೃತ್ತ ನಿರೀಕ್ಷಕ ಚಂದ್ರಶೇಖರ್ ನೇತೃತ್ವದಲ್ಲಿ, ವಿನೋಬ ನಗರ ಠಾಣೆಯ ಎಸ್‌ಐ ಉಮೇಶ್ ಕುಮಾರ್ ಹಾಗೂ ಸಿಬ್ಬಂದಿಗಳನ್ನೊಳಗೊಂಡ ತಂಡವನ್ನು ರಚಿಸಿ ಕಾರ್ಯಾಚರಣೆಗೆ ಇಳಿದಿತ್ತು.
ಪೊಲೀಸರು ಬೀಸಿದ ಬಲೆಗೆ ಕಿರಣ ಯಾನೆ ಬೆಕ್ಕು (24) ಹಾಗೂ ಶಿಕಾರಿಪುರ ತಾಲೂಕಿನ ಮತ್ತತಿಕೋಟೆ ಗ್ರಾಮದ ನಿವಾಸಿ ಗಣೇಶ್ ಯಾನೆ ಗಣಿ (33) ಇಬ್ಬರನ್ನು ಬಂಧಿಸಿದ್ದಾರೆ. ಕೃತ್ಯಕ್ಕೆ ಬಳಸಿದ 1 ದ್ವಿಚಕ್ರ ವಾಹನವನ್ನು ವಶ ಪಡಿಸಿಕೊಳ್ಳಲಾಗಿದೆ.
