ಶಿವಮೊಗ್ಗ : ಶಿವಮೊಗ್ಗ ಫಾರ್ಮಾ ಕ್ರಿಕೆಟ್ ಕ್ಲಬ್ ವತಿಯಿಂದ 27 ನೇ ರಾಜ್ಯ ಮಟ್ಟದ ಫಾರ್ಮಾ ಕಪ್ ಕ್ರಿಕೆಟ್ ಲೀಗ್ ಪಂದ್ಯಾವಳಿಯನ್ನು ಫೆ. 19 ಮತ್ತು 20 ರಂದು ಆಯೋಜಿಸಲಾಗಿದೆ ಎಂದು ಶಿವಮೊಗ್ಗ ಫಾರ್ಮಾ ಕಪ್ ಕ್ರಿಕೆಟ್ ಲೀಗ್ ಸಂಘಟನಾ ಸಮಿತಿ ಚೇರ್ಮನ್ ಸುರೇಶ್ ಎಲ್. ಹೇಳಿದ್ದಾರೆ.
ಇಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಪಂದ್ಯಾವಳಿಯು ಪ್ರತಿವರ್ಷ ನಡೆಯುತ್ತಿದ್ದು, ಶಿವಮೊಗ್ಗ ಸೇರಿದಂತೆ ರಾಜ್ಯದ 12 ತಂಡಗಳು ಭಾಗವಹಿಸಲಿವೆ. 1996 ರಲ್ಲಿ ಪ್ರಾರಂಭವಾದ ಈ ಪಂದ್ಯಾವಳಿ ಪ್ರತಿ ವರ್ಷ ಒಂದೊಂದು ಜಿಲ್ಲೆಯಲ್ಲಿ ಆಯೋಜನೆಗೊ ಳ್ಳುತ್ತದೆ. ಈ ಹಿಂದೆ 1999 ಹಾಗೂ 2011 ರಲ್ಲಿ ಶಿವಮೊಗ್ಗದಲ್ಲಿ ನಮ್ಮ ಸಂಸ್ಥೆಯಿಂದ ಪಂದ್ಯಾ ವಳಿಯನ್ನು ಯಶಸ್ವಿಯಾಗಿ ನಡೆಸಿದ್ದೇವೆ ಎಂದರು.
ಇದೀಗ ಮೂರನೇ ಬಾರಿಗೆ ಶಿವಮೊಗ್ಗದಲ್ಲಿ ಈ ಪ್ರತಿಷ್ಠಿತ ರಾಜ್ಯಮಟ್ಟದ ಪಂದ್ಯಾವಳಿ ನಡೆಯುತ್ತಿದ್ದು, ಇಂದು ಸಂಜೆ ನಗರದ ಕಂಟ್ರಿ ಕ್ಲಬ್ ನಲ್ಲಿ ಅದ್ಧೂರಿಯಾಗಿ ಉದ್ಘಾಟನಾ ಸಮಾರಂಭ ನಡೆಯಲಿದೆ. ಫೆ. 19 ಮತ್ತು 20 ರಂದು ಜೆ.ಎನ್.ಎನ್.ಸಿ.ಇ. ಕ್ರೀಡಾಂಗಣ, ಅಬ್ದುಲ್ ಕಲಾಂ ಕ್ರೀಡಾಂಗಣ ಪೆಸಿಟ್ ಕಾಲೇಜ್, ಕೃಷಿ ವಿದ್ಯಾಲಯ ಕ್ರೀಡಾಂಗಣ ನವುಲೆ ಇಲ್ಲಿ ಪಂದ್ಯಾವಳಿ ನಡೆಯಲಿದೆ. ಪ್ರಾರಂಭದ ಪಂದ್ಯ ಮತ್ತು ಸಮಾರೋಪ ಸಮಾರಂಭ ಜೆ.ಎನ್. ಎನ್.ಸಿ.ಇ. ಕ್ರೀಡಾಂಗಣದಲ್ಲಿ ನಡೆಯಲಿದೆ ಎಂದು ತಿಳಿಸಿದರು.
ವೈದ್ಯಕೀಯ ಪ್ರತಿನಿಧಿಗಳು ಹಾಗೂ ವೈದ್ಯರು ಕೂಡ ಈ ಪಂದ್ಯಾವಳಿಯಲ್ಲಿ ಭಾಗವಹಿಸಲಿದ್ದಾರೆ ಎಂದು ತಿಳಿಸಿದ ಅವರು, ಕೆ.ಇ. ಕಾಂತೇಶ್, ಸುಧೀಂದ್ರ ಸೇರಿದಂತೆ ಅನೇಕ ಗಣ್ಯರು ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ ಎಂದು ಮಾಹಿತಿ ನೀಡಿದರು.
ಪತ್ರಿಕಾಗೋಷ್ಠಿಯಲ್ಲಿ ಪದಾಧಿಕಾರಿಗಳಾದ ಉಮೇಶ್ ನಾಯಕ್, ವಿಕ್ರಂ ಶೆಟ್ಟಿ, ಹೆಚ್.ಪಿ. ಕಿರಣ್, ಹರೀಶ್ ಬಿ., ಎಂ. ರಾಘವೇಂದ್ರ ಮೊದಲಾದವರಿದ್ದರು.
