ಶಿವಮೊಗ್ಗ,ಅ.೨: ಪರಿಸರ ಪ್ರಜ್ಞೆ ಇಂದು ಅತಿ ಅಗತ್ಯವಾಗಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಜಿ.ಕೆ.ಮಿಥುನ್‌ಕುಮಾರ್ ಹೇಳಿದರು.
ಅವರು ಇಂದು ಬ್ಯಾರಿಸ್‌ವತಿಯಿಂದ ಆಯೋಜಿಸಿದ್ದ
ಬ್ಯಾರಿಸ್ ಗ್ರೀನ್ ರೈಡ್ ಸೈಕಲ್ ಜಾಥಾಕ್ಕೆ ಚಾಲನೆ ನೀಡಿ ಮಾತನಾಡಿದರು.
ಪರಿಸರ ಇಂದು ಹಾಳಾಗುತ್ತಿದೆ. ಈ ಬಗ್ಗೆ ಜಾಗೃತಿ ಮೂಡಬೇಕಾಗಿದೆ. ತಾಪಮಾನ ಹೆಚ್ಚಾಗುತ್ತಿದ್ದು, ಇದರಿಂದ ಪರಿಸರದ ಮೇಲೆ ಪರಿಣಾಮ ಬೀರುತ್ತಿದೆ. ಕೆಲವು ಸರಳ ಚಟುವಟಿಕೆಗಳನ್ನು ನಡೆಸುವುದರ ಮೂಲಕ ನಾವು ಪರಿಸರವನ್ನು ಕಾಪಾಡಬಹುದಾಗಿದೆ.
ಅದರಲ್ಲಿ ಸೈಕಲ್ ಕೂಡ ಒಂದು, ಸೈಕಲ್ ಪರಿಸರ ಸ್ನೇಹಿಯಾಗಿದೆ. ಕೇವಲ ದಿನಾಚರಣೆಗಾಗಿ ಬಳಸದೇ, ಪ್ರತಿ ದಿನ ಬಳಸುವಂತೆ ಯುವಕರಿಗೆ ಕಿವಿ ಮಾತು ಹೇಳಿದರು.
ಈ ಸಂದರ್ಭದಲ್ಲಿ ಬ್ಯಾರಿಸ್‌ನ ಮ್ಯಾನೇಜರ್ ಮೋಹಿದ್ದೀನ್, ಸಂಚಾಲಕ ನಂದಕುಮಾರ್ ಸೇರಿದಂತೆ ಹಲವರಿದ್ದರು.
ಸೈಕಲ್ ಜಾಥಾದಲ್ಲಿ ನಗರದ ಹಲವು ಕಾಲೇಜುಗಳ ವಿದ್ಯಾರ್ಥಿಗಳು ಪರಿಸರ ಪ್ರೇಮಿಗಳು ಸಂಘ ಸಂಸ್ಥೆಯ ಮುಖ್ಯಸ್ಥರು ಸೈಕಲ್ ಪ್ರಿಯರು ಭಾಗವಹಿಸಿದ್ದರು. ಜಾಥಾದಲ್ಲಿ ಭಾಗವಹಿಸಿದ ಎಲ್ಲರಿಗೂ ಬ್ಯಾರಿಸ್ ವತಿಯಿಂದ ಪ್ರಮಾಣ ಪತ್ರ ನೀಡಲಾಯಿತು.
