ಶಿವಮೊಗ್ಗ: ನಿನ್ನೆ ಗಾಡಿಕೊಪ್ಪದ ಸ್ಟಾರ್ ಹೋಟೆಲ್‌ವೊಂದಕ್ಕೆ ಊಟ ಮುಗಿಸಿ ಮರಳಿದಾಗ ಗೋಪಾಳದ ನಿವಾಸಿಯೊಬ್ಬರಿಗೆ ಅಚ್ಚರಿ ಕಾದಿತ್ತು. ತನ್ನ ದ್ವಿ ಚಕ್ರವಾಹನದ ಬಳಿ ಲ್ಯಾಬ್ರಾಡರ್ ಜಾತಿಯ ಶ್ವಾನವೊಂದು ತನ್ನ ವಾಹನ ಏರಿ ಕುಳಿತಿದ್ದು ಕಂಡುಬಂದಿತು. ಆಶ್ಚರ್ಯ ಚಕಿತರಾದ ಅವರು ಸುತ್ತ ಮುತ್ತಲೂ ಕಣ್ಣಾಡಿಸಿ ಶ್ವಾನದ ಮಾಲೀಕನಿಗಾಗಿ ಹುಡುಕಾಡಿದ್ದಾರೆ. ಎಷ್ಟೋ ಹೊತ್ತು ಕಳೆದರೂ ಮಾಲೀಕ ಇಲ್ಲದನ್ನು ಗಮನಿಸಿದ ಅವರು, ತುಂಗಾ ಠಾಣಾ ಪೊಲೀಸರಿಗೆ ದೂರವಾಣಿ ಮೂಲಕ ತಿಳಿಸಿ ಉತ್ತಮ ಜಾತಿಯ ಶ್ವಾನವೊಂದು ಅನಾಥವಾಗಿ ತನ್ನ ವಾಹನ ಏರಿದ್ದು, ಇಂಗ್ಲೀಷ್‌ನಲ್ಲಿ ಮಾತನಾಡಿದರೆ ಮಾತ್ರ ಸ್ಪಂದನೆ ವ್ಯಕ್ತಪಡಿಸುತ್ತಿದೆ. ಮಾಲೀಕನ ಸುಳಿವಿಲ್ಲ. ಕಳ್ಳರ ಪಾಲಾಗುವುದರಿಂದ ಏನು ಮಾಡಬೇಕೆಂದು ತಿಳಿಯುತ್ತಿಲ್ಲ ಎಂದು ಪೊಲೀಸರ ಬಳಿ ಭಾವನೆ ವ್ಯಕ್ತಪಡಿಸಿದ್ದಾರೆ.
ಇದಕ್ಕೆ ಸ್ಪಂದಿಸಿದ ತುಂಗಾ ನಗರ ಪೊಲೀಸರು ಮಾಲೀಕ ಪತ್ತೆಯಾಗುವವರೆಗೆ ಶ್ವಾನವನ್ನು ಠಾಣೆಗೆ ಕರೆ ತರುವಂತೆ ತಿಳಿಸಿದ ಮೇರೆಗೆ ನಿನ್ನೆಯಿಂದ ತುಂಗಾ ನಗರ ಪೊಲೀಸ್ ಠಾಣೆಯ ಆವರಣದಲ್ಲೇ ಶ್ವಾನ ಟೀಕಾಣಿ ಹೂಡಿದ್ದು, ಮೊದ ಮೊದಲು ಗುರಾಯಿಸುತ್ತಿದ್ದ ಶ್ವಾನ ಇದೀಗ ಪೊಲೀಸರು ಬಿಸ್ಕಿಟ್ ಹಾಗೂ ಹಾಲು ನೀಡಿದ ಬಳಿಕ ಗೆಳೆತನ ಮಾಡಿಕೊಂಡಿದ್ದು, ನಿಜವಾದ ಮಾಲೀಕನ ನಿರೀಕ್ಷೆಯಲ್ಲಿದೆ.
ಶ್ವಾನವನ್ನು ಕಳೆದುಕೊಂಡವರು ತುಂಗಾ ನಗರ ಠಾಣೆಯನ್ನು ಸಂಪರ್ಕಿಸಬಹುದು.
