ಶಿವಮೊಗ್ಗ, ಜೂ.06:
ಶಿವಮೊಗ್ಗ ನಗರದಲ್ಲಿ ರಾತ್ರಿಹೊತ್ತು ಮನೆಯ ಮುಂದೆ ನಿಲ್ಲಿಸಿದ ವಾಹನಗಳ ಪೆಟ್ರೋಲ್, ಬೈಕ್‌ಗಳು ಬೆಲೆ ಬಾಳುವ ವಸ್ತುಗಳ ಕಳ್ಳತನ ಇತ್ತೀಚೆಗೆ ತೀರಾ ಹೆಚ್ಚುತ್ತಿದ್ದು, ನಿನ್ನೆ ಮದ್ಯರಾತ್ರಿ ನಿರ್ಮಾಣವಾಗುತ್ತಿರುವ ೧೫ಕ್ಕೂ ಹೆಚ್ಚು ಮನೆಗಳಲ್ಲಿ ಅಳವಡಿಸಲಾಗಿದ್ದ ಬೋರ್‌ಗಳ ಕಾಪರ್ ವೈರನ್ನು ಕದ್ದಿರುವ ಘಟನೆ ವರದಿಯಾಗಿದೆ.
ನಗರದ ಹೊನ್ನಾಳಿ ರಸ್ತೆಯ ತೆವರಚಟ್ನಳ್ಳಿ ಬಳಿ ಇರುವ ಸರ್ಕಾರಿ ನೌಕರ ಸಂಘದ ನಿವೇಶನಗಳಲ್ಲಿ ಈ ಘಟನೆ ನಡೆಸಿದ್ದು, ಸಾವಿರಾರು ಮೌಲ್ಯದ ಕಾಪರ್ ವೈರ್‌ಗಳನ್ನು ಕದ್ದೊಯ್ದಿದ್ದಾರೆ.
ಇಡೀ ನಗರದಲ್ಲಿ ಇತ್ತೀಚೆಗೆ ಮದ್ಯರಾತ್ರಿ ಕಳುವುಗಳು ಮಿತಿಮೀರುತ್ತಿದ್ದು, ಪೊಲೀಸರು ರಾತ್ರಿ ಗಸ್ತಿನಲ್ಲಿ ಇರುತ್ತಾರೋ ಅಥವಾ ಇಲ್ಲವೋ ಎಂಬ ಅನುಮಾನ ಕಾಡುತ್ತಿದೆ. ಮೊನ್ನೆಯಷ್ಟೆ ಬೊಮ್ಮನಕಟ್ಟೆ ರಸ್ತೆಯ ವಿನೋಬನಗರ ಭಾಗದಲ್ಲಿ ಸಲಾಗಿ ಸುಮಾರು ಏಳೆಂಟು ಬೈಕ್‌ಗಳ ಪೆಟ್ರೋಲ್ ಕಳವು ಮಾಡಿದ್ದಾರೆ.
ಜಿಲ್ಲಾರಕ್ಷಣಾಧಿಕಾರಿಗಳು ರಾತ್ರಿ ಗಸ್ತಿನ ಬಗ್ಗೆ ಗಮನಹರಿಸಲು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.
