ಶಿವಮೊಗ್ಗ : ಭದ್ರಾವತಿ ತಾಲ್ಲೂಕಿನ ಸಿದ್ದಾಪುರದಲ್ಲಿ ಭದ್ರಾ ಬಲದಂಡೆ ಕಾಲುವೆಗೆ ಹಾರಿ ಆತ್ಮಹತ್ಯೆಗೆ ಯತ್ನಿಸಿದ ವೃದ್ಧರೊಬ್ಬರ ರಕ್ಷಣೆಗೆ ಹೋಗಿ ಯುವಕ ನಾಪತ್ತೆಯಾಗಿದ್ದಾನೆ.
ಹೊಸನಗರ ತಾಲ್ಲೂಕಿನ ರಿಪ್ಪನ್‌ಪೇಟೆಯ ನೆಹರೂ ನಗರದ ನಿವಾಸಿ ಅನೀದ್ (೨೨) ನಾಪತ್ತೆಯಾದ ಯುವಕ.
ಅಗ್ನಿಶಾಮಕ ಹಾಗೂ ಪೊಲೀಸರು ಶೋಧ ಕಾರ್ಯ ಮುಂದುವರಿಸಿದ್ದಾರೆ.
ಅನೀದ್ ಲಾರಿಯೊಂದರ ನಿರ್ವಾಹಕನಾಗಿದ್ದು, ದಾವಣಗೆರೆಯಿಂದ ಶಿವಮೊಗ್ಗಕ್ಕೆ ತೆರಳುತ್ತಿರುವ ಮಾರ್ಗ ಮಧ್ಯೆ ಅಗರದಹಳ್ಳಿ ಸಮೀಪ ಜನರ ಸಂದಣಿ ನೋಡಿ ಲಾರಿಯನ್ನು ನಿಲ್ಲಿಸಿದ್ದ. ಕಾಲುವೆಗೆ ವೃದ್ಧರೊಬ್ಬರು ಹಾರಿದ ವಿಷಯ ತಿಳಿದ ಅನೀದ್ ಅವರನ್ನು ರಕ್ಷಿಸಲು ಕಾಲುವೆಗೆ ಹಾರಿದ್ದಾನೆ.
ಕೆಲ ಸಮಯ ಕಳೆದರೂ ಅನೀದ್ ಪತ್ತೆಯಾಗಲಿಲ್ಲ. ಅಗ್ನಿಶಾಮಕ ದಳದ ಸಿಬ್ಬಂದಿ ಹಾಗೂ ಪೊಲೀಸರು ಕಾರ್ಯಾಚರಣೆ ನಡೆಸಿದರೂ ಆತ್ಮಹತ್ಯೆ ಮಾಡಿಕೊಂಡ ವೃದ್ಧರೊಬ್ಬರ ಶವ ಪತ್ತೆಯಾಯಿತು. ಆದರೆ ಅನೀದ್ ಪತ್ತೆಯಾಗಲಿಲ್ಲ. ಕಾರ್ಯಾಚರಣೆ ವೇಳೆ ಮತ್ತೊಬ್ಬ ವೃದ್ಧೆಯ ಶವ ಪತ್ತೆಯಾಗಿದೆ.
